चितवनमा गुडिरहेको बसमाथि ढुंगा खस्दा अनियन्त्रित भएर पल्टियो, १९ जना घाइते
चितवनको मुग्लिन नारायणगढ सडकखण्डमा बसमाथि ढुंगा खस्दा अनियन्त्रित भएर पल्टिएको छ । आज (शुक्रबार) दिउँसो पौने २ बजे भरतपुर महानगरपालिका २९ सत्रकिलोमा रौतहटको गौरबाट पोखरा जाँदै गरेको ग २ ख ४७ नम्बरको बसमाथि ढुंगा खसेको जिल्ला प्रहरी कार्यालय चितवनका डिएसपी भेषराज रिजालले जानकारी दिनुभयो ।
आत्तिँदा बस अनियन्त्रित भएर पल्टिएको हो । बसमा सवार १९ जना यात्रु घाइते छन् । घाइतेको उद्धार गरी उपचारको लागि भरतपुरका विभिन्न अस्पताल ल्याइएको रिजालले जानकारी दिनुभयो । घाइतेमध्ये ९ जनाको भरतपुर अस्पताल र १० जनाको पुरानो मेडिकल कलेज भरतपुरमा उपचार भइरहेको छ । घाइतेमध्ये दुई जनाको अवस्था गम्भिर रहेको रिजालले बताउनुभयो । बसमा करिब ३०÷३५ जना यात्रु रहेको प्रहरीले जनाएको छ ।दुर्घटनामा परेको बसमा समेत क्षति पुगेको छ । बस दुर्घटनापछि केहिबेर सडक अवरूद्ध भएको थियो । जिल्ला प्रहरी कार्यालय चितवन, जिल्ला ट्राफिक प्रहरी कार्यालयबाट प्रहरीको टोली उद्धारमा खटिएको छ ।
